Lazkaoko 2026ko Aurrekontu Parte-hartzaileen lehen faseak 137 proposamen jaso ditu
- 80 pertsonak hartu dute parte, gehienak emakumeak, eta parte-hartze handiena 50 eta 64 urte bitarteko adin-tartean izan da.
- Uztail eta abuztuan zehar proposamenen bideragarritasun teknikoa aztertuko da, eta irailean, herritarrek erabaki ahal izango dute zein proposamen gauzatu nahi dituzten.
Duela hilabete inguru, Lazkaoko Udalak aurrekontu parte-hartzaileen prozesuaren bigarren edizioa jarri zuen martxan. Herritarren parte-hartzea sustatu eta lazkaotarren ahotsa udal erabakietan txertatzeko helburuarekin, 2026ko aurrekontuko inbertsio-partidatik 100.000 euroko diru-poltsa jarri da herritarren eskura, lazkaotarrek diru hori zertan inbertitu erabaki dezaten.
Prozesua ekainaren 9an hasi zen, proposamenak aurkezteko fasearekin, eta ekainaren 30era arte egon da irekita. Epe horretan, lazkaotarrek udalerria hobetzeko ideiak eta proposamenak aurkeztu ahal izan dituzte, bai aurrez aurre, Udalaren postontzian formularioa utziz, bai online, udal webgunean eskuragarri dagoen formulario digitalaren bidez.
Aurkeztutako proposamenek udalaren eskumena izan behar zuten, inbertsioen partidaren bidez finantzagarriak izatea, teknikoki eta ekonomikoki bideragarriak izatea eta herritarren interes orokorra lehenestea. Prozesuan parte hartu ahal izan dute Lazkaon erroldatutako 16 urtetik gorako pertsonek.
Proposamenak jasotzeko faseak harrera ona izan du eta parte-hartze nabarmena erregistratu da: guztira 137 proposamen bildu dira. Guztira 80 lagunek hartu dute parte; gehienak emakumeak izan dira (51 emakume eta 29 gizon). Adinari dagokionez, 16 eta 84 urte bitarteko herritarrek parte hartu dute, eta talderik aktiboena 50 eta 64 urte bitartekoena izan da, ekarpen gehien egin duen multzoa.
Udaletik eskerrak eman nahi zaizkie fase honetan parte hartu duten herritar guztiei, eta azpimarratu dute “partaidetza altuak agerian uzten duela lazkaotarrek udalerria hobetzeko duten konpromisoa eta parte-hartze prozesu honen garrantzia indartzen duela”.
Prozesuaren hurrengo urratsak
Proposamenak jasotzeko fasea amaituta, prozesuak hurrengo pausuekin jarraituko du: ebaluazioa eta hautaketa. Uztailean eta abuztuan, udaleko zerbitzu teknikoek jasotako proposamen guztiak aztertuko dituzte, ezarritako baldintza tekniko eta ekonomikoak betetzen dituzten egiaztatzeko, eta haien bideragarritasuna aztertuko da.
Ondoren, irailaren 15etik 26ra egingo da onartutako proposamenen bozketa-fasea. Egun horietan, lazkaotarrek aukera izango dute erabakitzeko zein proposamen gauzatuko diren 2026ko aurrekontuko 100.000 euroekin.
Udalak prozesuaren aurrerapenen berri ematen jarraituko du, eta lazkaotar guztiei dei egiten die hurrengo faseetan ere parte hartzen jarrai dezaten, guztion artean udalerri hobea eraikitzeko bidean.
