Lazkaoko Udalak 2026ko Aurrekontu Parte-hartzaileen bozketa fasea abiatu du
- Aurkezpen fasean 137 proposamen jaso dira, eta udal zerbitzu teknikoek bideragarritasun-irizpideak aplikatuz 9 proiektu finalista hautatu dituzte. Orain, herritarren txanda da lehenetsiko diren proiektuak erabakitzeko.
- Bozkatzeko epea irailaren 30era arte egongo da zabalik. Herritarrek aurrez aurre bozkatu dezakete, astelehenetik ostiralera, 10:00etatik 19:00etara, Udaletxeko erakusketa aretoan dagoen kutxan formularioa entregatuz. Halaber, online bozkatzeko aukera ere badago, www.lazkao.eus webgunean eskuragarri dagoen formulario digitala betez: https://labur.eus/AurrekontuPartehartzaileakLazkao20262.
Lazkaoko Udalak 2026ko Aurrekontu Parte-hartzaileen bigarren fasea martxan jarri du, herritarrek lehentasunezkotzat jotzen dituzten proiektuak hautatzeko aukera izan dezaten. Lehen fasean, herritarrek 137 proposamen aurkeztu zituzten guztira, eta udaleko zerbitzu teknikoek egindako azterketa teknikoaren ostean, 9 proiektu hautatu dira azken bozketa faserako. Orain, herritarren txanda da, gauzatzeko garrantzitsuenak iruditzen zaizkien hiru proiektuak lehenesteko.
Udalak 100.000 euroko aurrekontua bideratuko du hautatutako proiektuak gauzatzeko. Herritarrek hainbat proposamenen artean aukera dezakete, hala nola, espazio publikoak hobetzea, aisialdirako azpiegiturak sortzea edo mugikortasun jasangarria sustatzea.
Lehenesteko proiektuak:
- Bizikleten aparkalekuak estaltzea — 25.000 euro
- Auto elektrikoentzako karga-puntuak — 15.000 euro
- Eserleku gehiago Plazan — 10.000 euro
- San Prudentzio auzoko iturria — 2.500 euro
- Hirigoien auzoko haur-parkean zorua berritzea — 40.000 euro
- Bide-segurtasun neurriak auzoetara zabaltzea — 20.000 euro
- Kirol-makina gehiago Joxemiel Barandiaran Udal Kiroldegian — 20.000 euro
- Itzalkiak igerileku estali gabean — 12.000 euro
- Berdeguneetan landare eta zuhaitzak landatzea — 10.000 euro
Parte hartzeko bideak
Lazkaon erroldatutako eta 16 urte baino gehiagoko pertsona guztiek parte har dezakete. Pertsona bakoitzak bozketa bakarra egin dezake. Bozketa bi modutan egin daiteke:
- Aurrez aurre: Bozketa-orriak Udaletxeko erakusketa gelan dagoen kutxan utzita, astelehenetik ostiralera 10:00etatik 19:00etara (larunbat eta igandeetan itxita).
- Online: Bozketa digitala udalaren webgunean eskuragarri dagoen formularioa betez: www.lazkao.eus: https://labur.eus/AurrekontuPartehartzaileakLazkao20262
Bozkatzeko epea irailaren 30era arte egongo da zabalik.
Lazkaoko Udalak herritarrei parte hartzeko deia egiten die, haien iritzi eta lehentasunek udalerriko etorkizuna baldintzatzen dutelako. Parte-hartze aktiboa funtsezkoa da herritarren benetako beharrak eta lehentasunak islatzen dituzten proiektuak gauzatzeko.
