• Kepa Zubiarrain alkateak ongietorria egin zien Ateak Ireki programan parte hartzen ari diren gazte estatubatuarrei, eta eskerrak eman zizkien Goierriko familiei euren abegikortasunagatik.

Joan den larunbatean, Lazkaoko alkate Kepa Zubiarrain Erauskinek, Lazkaoko Udalaren izenean, harrera egin zien Goierriko familiei eta Ateak Ireki programan parte hartzen duten gazteei. Ekimen honen helburua Euskal Herriaren eta Estatu Batuetako euskal jatorriko gazteen arteko loturak sendotzea da.

Hiru astez, euskal kulturan eta hizkuntzan murgildutako esperientzia biziko dute bisitari gazteek Goierriko familiei esker. Maizpide barnetegian euskara ikasteaz gain, euskal historian, dantzetan, musikan eta kulturan murgilduko dira.

Alkateak eskerrak eman zizkien familiei abegikortasunagatik, eta aukera hori ahalik eta gehien aprobetxatzera animatu zituen gazteak, elkartruke kultural horiek lotura komunitarioak indartzeko duten garrantzia azpimarratuz.

Lazkaok kultura eta familia loturak eta euskara sustatzeko eta indartzeko konpromisoa berresten du, Ateak Ireki programan parte hartzen duten pertsona guztientzat esperientzia aberasgarria eskainiz.