- "Gurea erabil dezakezu" ekimenaren helburu nagusia nerabeek mugikor bat aldean eramateko beharra ez sentitzea da. Horretarako, dendetako eta udal-eraikinetako telefonoak nerabeen eskura jartzea proposatzen da, beharrezko deiak egin ditzaten.
- Udalak ekimena babesten eta laguntzen du.
'Altxa Burua Lazkao', nerabeek mugikorrak eta pantailak nola erabiltzen dituzten kezkatuta dauden herriko guraso talde batek bultzatutako proiektua da, eta 2021az geroztik ari da lanean San Benito Ikastolarekin eta Lazkaoko Udalarekin elkarlanean, irtenbide praktikoak bilatzeko. Harrezkero, hainbat hitzaldi, tailer eta kontzientziazio-jarduera antolatu dira arazo garrantzitsu horri aurre egiteko.
Ekimen honen baitan, 'Altxa Burua Lazkao' k "Gurea erabil dezakezu" izeneko proiektu berria abiatu du. Proiektu hau arrakastaz inplementatu da beste herri batzuetan, eta nerabeek mugikorrekiko duten mendekotasuna murriztea du helburu, irtenbide praktiko bat eskainiz.
"Gurea erabil dezakezu" ekimenaren helburu nagusia nerabeek mugikor bat aldean eramateko aitzakiarik ez izatea da, batez ere arrazoi nagusia helduei deiak egiteko aukera denean. Horretarako, dendetako eta udal-eraikinetako telefonoak nerabeen eskura jartzea proposatzen da, beharrezko deiak egin ditzaten.
Proiektuan parte hartzen duten saltokiak eta udal-eraikinak identifikatzeko, "Gurea erabil dezakezu" dioen pegatina bat jarriko da erakusleihoan edo sarreran.
'Altxa Burua Lazkao' taldeak gutun bat bidali dio herriko saltokiei, Udalaren laguntzarekin, proiektu honetan parte hartzeko eta babesa emateko eskatuz. Gutunean, taldeak ekimenaren garrantzia eta interesa duten saltokiak nola batu daitezkeen azaltzen du. Lazkaoko Udalak, bere aldetik, erabat babesten du ekimena eta saltoki guztiak animatu nahi ditu "Gurea erabil dezakezu" proiektuarekin bat egitera. Gainera, Udalak berak pegatina bat jarriko du kiroldegian, nerabeek deiak egin ahal izateko. Horrela, herriko nerabeentzat ingurune osasungarriagoa eta orekatuagoa sustatzen lagundu nahi da.
Zalantzak argitu nahi izanez gero, idatzi Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko. helbidera.
