•   Lanak aurreikusitako planaren arabera aurrera doaz, eta ezarritako exekuzio epea betez, apirilaren 15ean amaitzea aurreikusten da.
•   11-15 eta 15-25 atarietan, asfaltatzea eta zuhaitzak landatzea falta dira. Bestalde, 16-20 eta 25-30 atarietan, datorren astean espaloien hormigonatzea hasiko da, eta 1-10 zatian, lanak oraindik hasteke daude.

Zubizkitza auzoaren berrurbanizazio lanek ezarritako planaren arabera erritmo onean doaz aurrera,herritarrentzako eragozpenak murrizteko faseka garatuz. SASOI ERAIKUNTZAK, S.L. enpresari esleitutako lanek 276.002 €-ko aurrekontua dute, BEZik gabe, eta hiru hilabeteko iraupena izango dute, apirilaren 15ean amaitzea aurreikusten da.

Gaur egun, 11-15 eta 15-25 atarietan ia amaitu dira ur-hornidura eta argiztapenerako instalazio berriak, baita espaloien berritzea ere. Gune horietan, asfaltatzeko eta zuhaitzak landatzeko lanak egiteke daude. Bestalde, 16-20 eta 25-30 atarietan, datorren astean hastea aurreikusten da instalazio-lanak eta espaloien hormigonatzea. Bien bitartean, 1etik 10era bitarteko zatian, oraindik ez dira lanak hasi.

Berrurbanizazioaren hirugarren fase honek 2.376 m²-ko eremua hobetzea du helburu, udalaren irisgarritasun, iraunkortasun eta energia-eraginkortasunarekiko konpromisoa sendotuz. Zoruaren berritzeaz gain, ur-hornidura sarea ere eguneratzen ari da galerak murrizteko eta horniduraren eraginkortasuna hobetzeko. Era berean, kontsumo txikiko argiztapen-sistema berriak instalatuko dira, auzo osoan argiztapen uniformea bermatzeko, segurtasuna areagotzeko eta energia aurrezteko.