• San Prudentzio jaiak apirilaren 25etik maiatzaren 1era ospatuko dira, eta Lazkaomendikoak maiatzaren 2tik 4ra, aurtengoan Lazkaoko Gazte Asanbladaren eskutik, arratsaldeko 18:00etan, txupinazoa jaurtiz. 
• Egitarauan honako ekitaldiak nabarmentzen dira; Bide Batez, Lowe Band eta Oihan Vega taldeetako kontzertuak, Soka Dantza, Zezensuzkoa, herri kirolen erakustaldiak eta haurrentzako ekintzak, besteak beste, Tor eta Txoborro magoak eta Dj Kaktus.
• Programa kontsultatu HEMEN. 

Lazkaoko Udala 2025eko San Prudentzio eta Lazkaomendiko jaietako egitaraua aurkeztu du.
San Prudentzio jaiak apirilaren 25etik maiatzaren 1era ospatuko dira, eta Lazkaomendikoak, berriz, maiatzaren 2tik 4ra. 

Lazkaoko Gazte Asanbladak apirilaren 25ean, 18:00etan, jaiei hasiera emango dien txupinazoa jaurtiko du, herritarren bozketa bidez aukeratua. Orduan hasiko da festa, eta programatutako ekitaldi ugarik jarraipena izango dute.

Musika eta kultura

Aurtengo musika egitaraua anitza eta gustu guztientzako da. Bide Batez, Lowe Band, Xaibor, Akerbeltz, Süne, Muxutruk eta Oihan Vega taldeek joko dute, baita metodo Ripley, The Soulanders, Local 5bis eta Distorted Bass herriko taldeek ere. Ez dira faltako Lazkaoko Musika Banda, Jundajo txaranga, Kantaka abesbatzak, Suthai batukada eta Lazkaoko Erraldoi eta Buruhandi Konpartsak. Horrez gain, Azki Emakume Elkarteak apirilaren 25etik maiatzaren 1era arte antolatuko duen erakusketa izango da, 12:00-14:00 eta 19:00-21:00 artean. Lazkaoko Udalak eskerrak eman nahi dizkio bereziki Azki elkarteari Soka Dantzarako egindako zapi ederrengatik.

Kirolak

Kirol arloan, honako ekintzak izango dira: VII. Bikote Kros Lasterketa, pelotan manomanista lehiaketa finala, LAPKE elkartearen pelota erakustaldiak, herri kirolak eta Lazkaoko LXXVII. Txirrindularitza Froga. San Prudentzio Igeriketa Saria (igeriketa), toka eta dantza solteko txapelketak (XLIII. Dantza Txapelketa), eta ibilaldi neurtua ere izango dira. 

Haurren ekintzak

Txikiek ere gozatzeko aukera izango dute jaietan, Tor eta Txoborro magoen, Dj Kaktusen, Play Backen, Marieta Zirkusen, Mugitu Zaitez-en eta Kiki eta Koko pailazoen ikuskizunekin. Umeen Eguna apirilaren 29an ospatuko da, goizez eta arratsaldez  haurrentzako parkea izango dute, baita bazkari herrikoia, jolasak eta Play Back ikuskizuna ere. 

Garraio berezia

Apirilaren 25, 26 eta 30ean garraio zerbitzu bereziak egongo dira, arratsalde-iluntzean Ordiziatik abiatuta, Beasainen geldialdia eginez eta Ataunetik abiatuta. Horrez gain, Lazkaotik abiatuta joan-etorriak izango dira, aipatutako norabideetan, jaietara bertaratzeko errazteko.  Lazkaomendiko jaietarako ere garraio zerbitzu berezia egongo da. 

Lazkaomendiko jaiak 

Lazkaomendiko jaiak maiatzaren 2an hasiko dira, eta ekintzez betetako asteburua izango da. Egun berean, erraldoien konpartsa, talo tailerra eta karaoke saioa izango dira Lartxaiko plazan. 

Maiatzaren 3an, XLIX. Txirrindularitza Froga ospatuko da, eta Lartxaiko plazan pelota erakustaldi bat ere izango da. Goierriko taldeek herri kiroleko saioa eskainoko dute, eta Ane Urretabizkaia, Saioa Berasategi, Uxue Kerejeta eta Eider Tolosa trikitilariak bi saio eskainiko dituzte. Ondoren, afari herrikoia izango da, eta DJ Oixani-ren emanaldiarekin amaituko da eguna.

Maiatzaren 4an, Lazkaotik Lazkaomendira 8:15ean ibilaldi bat abiatuko da. Ondoren, haurrentzako jolasak antolatu dira, eta saioak izango dira Oin Arin eta LTME trikitilarien ikuskizunekin. Horretaz gain, meza ermitan ospatuko da, eta pailazoek eta bertsolariek (Nerea Ibarzabal eta Julio Soto) girotuko dute eguna. Amaitzeko, Izer eta Alabier trikitilarien kontzertuak izango dira. 

Eskerrak herritarrei

“Egitarau zabala herritar, talde eta agentziekin elkarlanean garatu da, eta eskerrak eman nahi dizkiegu guztiei egindako lanagatik. Ez da ahaztu behar jaien antolaketan parte hartuko duten boluntario eta udal-langileei, eta horiek gabe guzti hau ez litzateke posible izango”, nabarmendu dute udal ordezkariek. “Ohiko moduan, arduraz jokatzea funtsezkoa da. Udalak jaietan errespetuz, berdintasunez jokatzeko eskatzen du. Horretarako, sentsibilizazio kanpainak martxan jarriko dira hurrengo egunetan, eta horietan sexista edo LGTBIfobiko erasoren bat gertatuz gero nola jokatu azalduko da”, adierazi du Kepa Zubiarrain alkateak. “Lazkaoko herritar zein bisitariei bertaratzeko gonbita luzatzen zaie jaiez gozatzeko beti ere alaitasunez, umore onez eta errespetuz”.

San Prudentzio jaietako egitaraua Lazkaoko etxe guztietan banatu da. Horrez gain, egitaraua bere osotasunean HEMEN.