• Adin guztientzako jarduerez beteriko astebete baino gehiagoko egitaraua izan da 2025ekoa, kontzertuak, kirola, kultura herrikoia eta jaiez gozatzeko autobus zerbitzu bereziak barne.

Lazkaoko Udalak balorazio oso positiboa egin du 2025eko San Prudentzio eta Lazkaomendiko jaietako. Apirilaren 25etik maiatzaren 4ra bitartean ospatutako egitarau zabalak herritarren eta bisitarien harrera bikaina izan du. “Parte-hartze handia izan da, giro ona, jardueren aniztasuna eta jendearen jarrera eredugarria nabarmendu behar dira”, adierazi dute udal ordezkariek. Halaber, ez da inolako erasorik izan, eta horrek erakusten du herritarren konpromisoa jai seguru eta errespetuzkoekin.

Apirilaren 25ean hasi ziren jaiak, Lazkaoko Gazte Asanbladak jaurtitako suziriaren bidez; talde hori herritarren botoz aukeratua izan da. Une horretatik aurrera, musika, kirola, kultura eta adin guztietarako jarduerez beteriko egunak etorri dira. Nabarmendu behar dira Bide Batez, Lowe Band, Xaibor, Akerbeltz eta Oihan Vega-ren kontzertuak, baita tokiko taldeak ere: Método Ripley, The Soulanders, Local 5bis eta Distorted Bass.

Ez dira falta izan ohiko hitzorduak, hala nola Soka Dantza, herri kirolak, Suzko Zezena, erraldoi eta buruhandien konpartsa eta eskuz pilotako erakustaldiak. Haur eta gaztetxoentzako jarduerak ere ugari izan dira: Tor eta Txoborro magoak, Dj Kaktus, Play Back ikuskizuna edo Kiki eta Koko pailazoak. Apirilaren 29an ospatu zen Umeen Eguna, jolasak, jolas-parkeak, herri bazkaria eta ikuskizunak bildu zituen festa-giroan.

Kirol arloan, arrakastaz ospatu dira Bikoteka Krosa, San Prudentzio Igeriketa Saria, Lazkaoko txirrindularitza proba, toka txapelketa eta martxa erregularra. Horrez gain, Azki Emakumeen Elkarteak erakusketa bat antolatu du eta eskuz egindako zapiak prestatu ditu Soka Dantzarako; ekimen horregatik, Udalak eskerrak eman nahi izan dizkio publikoki.

Udalak eskerrak eman dizkie garbiketa-langileei, osasun- eta prebentzio-langileei, antolaketan parte hartu duten elkarte eta kolektiboei, eta jaien arrakasta ahalbidetu duten boluntario guztiei. Noski, ere, herritar guztiei, antolatutako ekintzetan izan duten partehartzeagatik. Era berean, jaiegun esanguratsuenetan antolatutako autobus zerbitzu berezia positiboki baloratu du, herritarren mugikortasuna eta parte-hartzea erraztu baititu.