• Ikastaroak San Benito Ikastolako haurren gurasoei, aitona-amonei eta zaintzaz arduratzen diren pertsonei zuzenduta daude. 

• Interesdunek izen-emate orria bete, eta 2025eko ekainaren 27a baino lehen San Benito Ikastolara entregatu edo bidali beharko dute.

Lazkaoko Udala, San Benito Ikastola eta Maizpide Euskaltegiarekin elkarlanean, berriz jarriko du martxan herrian euskararen erabilera indartzea helburu duen prestakuntza-ekimena. Doako ikastaroen bidez, San Benito Ikastolako haurren gurasoek, aitona-amonek eta zaintzaz arduratzen diren pertsonek euskara ikasteko aukera izango dute, modu hurbil eta errazean.

Ekimen honen bidez, Lazkaon euskararen erabilera-datuak hobetzea bilatzen da, eta, aldi berean, hizkuntzaren erabilera sustatuko duen familia-giroa sendotzea. Parte hartzaileek egingo duten ahalegina eredugarria izango da eta belaunaldi berrientzako motibazio iturri bihurtuko da.

Ikastaroek 2025eko urrian izango dute hasiera eta ikasturte osoan zehar luzatuko dira. Hiru maila eskainiko dira, parte-hartzaileen aurretiko ezagutzen arabera: hastapen maila, oinarrizko maila eta tarteko maila. Eskolak astelehenetik ostegunera emango dira, 14:30etik 16:00etara, familia-betebeharrekin bateragarria den ordutegian.

Interesdunek izen-emate orria bete eta San Benito Ikastolara ekainaren 27a baino lehen entregatu edo bidali beharko dute.

Udalak familiei eta zaintzaileei aukera hau baliatzeko deia egiten die, euskararen ezagutzak eta erabilerak herriko nortasuna sendotzen laguntzen baitute.