- Urbanizazio eta saneamendu lan berriek Areso, Antzalde kaleetan eta Enpaundi inguruan izango dute lehentasuna, ur pilaketak saihesteko eta euri-jasei aurre egiteko azpiegiturak hobetuz.
Lazkaoko Udalak 100.000 euroko ezohiko aurrekontu-partida onartu du, udalerrian euriteen ondorioak arintzen lagunduko duten urbanizazio- eta saneamendu-lan berriak egiteko. Ekaineko osoko bilkuran hartutako neurri horren helburua 2024ko maiatzean izandako euriteek eta joan den ekainean izandakoek eragindako arazoak saihestea eta murriztea da.
Esku-hartzeak euri-jasek gehien kaltetutako eremuetan egingo dira, zehazki, Areso eta Antzalde kaleetan, baita ibaiaren jaitsieraren ondoan dagoen Enpaundi inguruan ere. Gune horietan, azken hilabeteko euriteek agerian utzi dute saneamendu- eta urbanizazio-azpiegiturak lehenbailehen indartu behar direla, etorkizuneko arazoak ekiditeko.
Udalak jarduera horien garrantzia azpimarratu du, eta klima aldaketaren eta euri jasen ondorioei aurrea hartzeko konpromisoa nabarmendu du. "Gure lehentasuna herritarren segurtasuna eta ongizatea bermatzea da", adierazi dute, herriko azpiegitura hobetzeko beste erakunde batzuekin lankidetza azpimarratuz.
Lan hauekk azken urteetan udalerriko hainbat eremutan egindako beste jarduketa batzuei gehitu behar zaizkie. Amaitutako esku-hartzeen artean daude Mikelar, Santa Magdalena, Esparru, Zubierreka eta San Prudentzioko hobekuntzak, non azpiegiturak hobetu diren sotoetan eta etxabeetan ura pilatzea saihesteko, eta hiri ingurunea oro har hobetzeko. Azken euriteek agerian utzi dute jarduketa horien eraginkortasuna, ur-metaketa txikiagoa izan baita esku-hartutako eremuetan.
Gainera, Lazkaoko Udalak lan garrantzitsuak egin ditu Lazkaomendi inguruan euri urak behar bezala bideratzeko, batez ere Iturgaitzaga eta Lazkaomendi arteko zatian. Hobekuntza horiek Lazkao Txiki plazari eta Maizpide euskaltegiaren inguruari euri-jasa handietan eragiten zieten metatze-arazoak konpontzea lortu dute.
Erakundeen arteko lankidetzak ere berebiziko garrantzia izan du honelako jarduketetan. Gipuzkoako Foru Aldundiak, Errepideetako Sailaren bidez, duela gutxi Lazkao eta Olaberria lotzen dituen errepidean lanak burutu ditu, euri-urak Sustraitz ibaira bideratzeko. Horrelako esku-hartzeek Lazkaoko hirigunera ura iristea saihesten laguntzen dute, pilaketa arriskua murriztuz eta fenomeno meteorologiko kaltegarrien aurrean herriak duen egokitzapen gaitasuna hobetuz.
Neurri horiekin guztiekin, Lazkaoko Udalak udalerria babesteko eta herritarren bizi kalitatea hobetzeko konpromisoa berresten du, modu proaktiboan lan eginez klima aldaketaren erronkei aurre egiteko eta herritar guztientzako etorkizun seguruagoa eta jasangarriagoa bermatzeko.
