- Prozesua herritarrek hautagaitzak aurkeztuz hasiko da, Udalak finalistak aukeratzen jarraituko du, eta Lazkaoko herritarrei irekitako herri bozketa batekin amaituko da. Horren emaitza martxoaren 4an jakinaraziko da, martxoaren 2an bozketa epea itxi ondoren.
Lazkaoko Udalak herritarrei zuzendutako prozesu parte-hartzailea jarri du abian, jaiei hasiera emango duen txupina botako duen pertsona edo kolektiboa aukeratzeko. Ekimen horrek herritarren parte-hartzea bultzatu nahi du udalerriko jaietan eta herri-bizitzan, eta hiru fasetan garatuko da.
Lehen fasean, Lazkaoko herritarrek txupina botatzea merezi dutela uste duten pertsonen edo kolektiboen izenak proposatu ahal izango dituzte. Hautagaitzak bi modutara aurkeztu ahal izango dira Udalaren webgunean www.lazkao.eus (https://labur.eus/SanPrudentzioLazkaotxupina2026) eskuragarri egongo den formularioa betez edo proposamena Udalean gaitutako postontzian utziz, urtarrilaren 19tik otsailaren 2ra arte.
Proposatutako pertsona edo kolektiboek derrigorrezko baldintza hauek bete beharko dituzte: gutxienez bi urtez herrigintzan lan egin izana; pertsona fisikoen kasuan, Lazkaon erroldatuta egotea; edo egoitza fiskala eta jarduera udalerrian izatea, erakunde edo taldeen kasuan. Gainera, ezinbestekoa izango da 16 urte edo gehiago izatea/ adinez nagusi izatea.
Osagarri gisa, positiboki baloratuko da herriarekiko lotura, hezkuntza, berdintasuna, gizarte-ekintza edo kirola bezalako esparruetan parte hartzea, bai eta udal-bizitzari egindako beste edozein ekarpen garrantzitsu ere.
Kasu guztietan, beharrezkoa izango da proposatutako pertsonaren edo taldearen izena argi eta garbi adieraztea eta txupina zergatik bota behar duen justifikatzea. Osatu gabeko edo justifikazio egokirik gabeko proposamenak prozesutik kanpo geratuko dira. Gainera, prozesuaren datak alda daitezke ezinbesteko arrazoiengatik.
Hautagaitzak jasotzeko epea amaitu ondoren, ezarritako baldintzak betetzen ez dituzten proposamenak kanpoan utzi eta onartutakoen artetik 4 aukeratuko dira.
Horretarako, honako irizpide hauek hartuko dira kontuan: udalerriari egindako ekarpena, bere eremuko merezimenduak, berdintasunaren, bizikidetzaren eta euskal kulturaren aldeko lana. Adinez nagusia izatea ere beharrezkoa izango da.
Otsailaren 14an jakinaraziko ditu Udalak lau hautagaitza finalistak. Otsailaren 16tik aurrera, txupina botako duen pertsona edo kolektiboa aukeratzeko bozketa-epea irekiko da, eta prozesu hori martxoaren 2ra arte luzatuko da.
Parte hartzeko, Udalaren webgunean eskuragarri dagoen online formularioa erabili ahal izango da edo aldez aurretik etxeetan banatuko den orria Udalaren postontzian entregatu. Lazkaon erroldatuta dauden eta 16 urte edo gehiago dituzten pertsonek bozkatu ahal izango dute. Botoaren baliozkotasuna bermatzeko, NAN zenbakia adierazi beharko da. Botoa konfidentziala izango da, eta pertsona bakoitzak boto bakarra eman ahal izango du.
Behin epea amaituta, prozesuaren emaitza martxoaren 4an jakinaraziko da.
Lazkaoko Udalak prozesu honetan aktiboki parte hartzeko deia egiten die herritarrei, udalerriarekiko konpromisoa islatzen duten hautagaitzak proposatuz eta, ondoren, datozen jaietako txupina botatzeko ohorea izango duena aukeratzeko botoa emanez.
