• Maiatzaren 22an, ostiralean, 17:00etatik 19:30era, Lazkaoko plazan, jaialdiak hainbat tokitako jatorrizko jantzien desfilea, janari eta edari dastaketa, tailerrak, henna, piñata, musika eta dantza eskainiko ditu.
• Programazioa Areriako zinema saioekin osatuko da: “Recreación de un asesinato” filma, Bidaiariak zinemara promozioari atxikia, proiektatuko da. 

Beste aste batez, lazkaotarrek kultur agenda zabala izango dute, adin desberdinetako publikoari zuzendutako proposamenekin. Horien artean, Kulturarteko Jaialdia 2026 eta Areriako ohiko zinema saioak nabarmenduko dira.

Programazioa maiatzaren 22an, ostiralean, hasiko da, Kulturarteko Jaialdia 2026 ekitaldiarekin. Jaia 17:00etatik 19:30era izango da, Lazkaoko plazan, jatorri desberdinetako pertsonek elkar ezagutu eta udalerriko kultur aniztasuna partekatzeko helburuarekin. Lazkaon 29 herrialde desberdinetako biztanleak bizi dira elkarrekin, eta ekimenak hainbat kulturatara hurbiltzeko gunea eskainiko du, besteak beste, hainbat tokitako jatorrizko jantzien desfilearen, janari eta edari dastaketaren, elkarrekin kozinatzeko aukeraren, hennaren, piñataren, musikaren eta dantzaren bidez. Horrez gain, haurrentzako jarduerak ere antolatuko dira, hala nola piñata mexikarra eta zaku lasterketa, baita talo marokoarra, msemen, eta euskal taloa egiten ikasteko tailerra ere. Gainera, Ekuadorreko eta Nikaraguako musika eta dantzez gozatzeko aukera izango da, eta Nikaraguako, Kolonbiako, Marokoko, Errumaniako, Mexikoko eta Euskal Herriko edari eta janari tipikoak dastatu ahal izango dira. 

Zinemari dagokionez, Areriak “Recreación de un asesinato” filma eskainiko du. Bidaiariak zinemara promozioaren baitan ikusi ahal izango da maiatzaren 23an, larunbatean, 19:30ean eta 22:00etan; hilaren 24an, igandean, 19:30ean; eta hilaren 25ean, astelehenean, 19:00etan eta 21:00etan. 

Udalak egun hauetan antolatutako ekintzetan parte hartzera gonbidatzen ditu herritarrak.