• Guztira, 289 lagunek parte hartu dute bozketan, 109k online eta 180k aurrez aurre. Meandroko jarduketak jaso du babesik handiena, 207 botorekin, jada abian dena.

• Orobioneko Adinekoen Zentroa hobetzeko proposamenak 201 boto jaso ditu; udal ikasgelan klimatizazio sistema bat instalatzekoak, 162; San Prudentzio auzoan igogailua jartzeko azterlana eta proiektua idaztekoak, 120; kiroldegiaren aurrean bizikletentzako aparkaleku estalia jartzekoak, 101; eta haurdunaldiko, jaiotza inguruko eta jaioberriaren galeraren dolua bizi duten familientzako laguntza eta babesgunea sortzekoak, 89.

Lazkaoko Udalak amaitutzat eman du 2027ko Aurrekontu Parte-hartzaileen bozketa, 289 lagunek parte hartu ostean. Horietatik 109k online formularioaren bidez eman dute botoa, eta 180k aurrez aurre. Horrela amaitu da 100.000 euroko zuzkidura duen prozesua. Hasieran, herritarrek 142 proposamen aurkeztu zituzten, eta, azterketa teknikoa egin ondoren, sei proiektu iritsi ziren azken bozketara.

Lazkaon erroldatuta dauden 16 urtetik gorako herritarrek parte har zezaketen bozketan, sei proposamenetatik hiru aukeratuta eta lehentasunaren arabera ordenatuta. Botoak zenbatu ostean, Meandroan zuhaitzak landatzeko eta bankuak jartzeko proposamenak jaso du babesik handiena, 207 botorekin. Jarduketa hori dagoeneko gauzatzen ari da Udala. Bankuak jarrita daude, eta zuhaitzak urtea amaitu baino lehen landatuko dira.

Oso gertu geratu da Orobioneko Adinekoen Zentroko altzariak berritzeko eta klimatizazio sistema bat instalatzeko proposamena, 201 botorekin. Ondoren, udal ikasgelan klimatizazio sistema bat instalatzeko proposamena dago, 162 botorekin, eta San Prudentzio auzoan igogailu bat jartzeko azterlana eta proiektua idaztekoa, 120 botorekin.

Bestalde, kiroldegiaren aurrean bizikletentzako aparkaleku estali bat jartzeko proposamenak 101 boto jaso ditu, eta haurdunaldiko, jaiotza inguruko eta jaioberriaren galeraren dolua bizi duten familientzako laguntza eta babesgune bat sortzekoak, berriz, 89.

Lazkaoko Udalak jarduketa guztiak gauzatuko ditu, udalerriko eguneroko bizitzarekin lotutako hainbat arlotan herritarrek egindako proposamenei erantzunez, besteak beste, irisgarritasunari, mugikortasunari, ekipamendu publikoei, adinekoen ongizateari eta familiei eskaintzen zaien laguntzari lotutakoei.