- 2024-2025 ikasturtean, ikasleek uraren egoerari buruzko diagnostiko bat egin zuten eta hobetzeko lehentasunak ezarri zituzten. 2025-2026 ikasturtean, berriz, esku-hartze planak garatu dituzte, hezkuntza-ekintzak, inkestak, sentsibilizazio kanpainak eta udalerriko ur-sistemaren azterketa barne, baita jarduera praktikoak ere, hala nola bisitak, eskola baratzea, konpostajea eta ingurumen tailerrak.
2024-2025 eta 2025-2026 ikasturteetan, Lazkaoko hezkuntza komunitateak ziklo berri bat garatu du Eskolako Agenda 2030en baitan, 6. Garapen Jasangarrirako Helburuan oinarrituta, ur garbiarekin eta saneamenduarekin lotuta. Lanak hainbat hezkuntza-etapa inplikatu ditu, uraren zikloaren ezagutza hobetzeko eta haren erabilera arduratsua sustatzeko helburuz, diagnostiko, analisi eta ekintza prozesu jarraitu baten bidez, bai ikastetxean, bai udalerrian. Lazkaoko udalbatza aretoan aurkeztu dituzte emaitzak.
2024-2025 ikasturtean uraren egoerari buruzko hasierako diagnostiko bat egin zen, eta hortik ondorioak atera eta jarduteko lehentasunak ezarri ziren. Horietatik abiatuta, 2025-2026 ikasturtean esku hartzeko planak garatu dira, eta horiei esker azterketa hori hezkuntzaren eta komunitatearen arloko ekintza zehatzetara eraman ahal izan da.
Ikastetxean, ekoordezkariak aukeratu ziren eta EKIN ORAIN taldea sortu zen, proiektuaren ekimenak koordinatu dituena, “Toki txikietan, jende askok gauza xumeak eginez, mundua alda dezakegulako… EKIN ORAIN!” lelopean, ingurunea zaintzen ikasleen inplikazioa sustatuz.
Uraren erabilera arduratsua izan da ardatz nagusietako bat. HHn eta LH1-2n uraren balioa funtsezko baliabide gisa landu da. LH3-4n zentroko komunen erabilerari buruzko inkestak egin dira, eta emaitzak aztertu dira; horietan detektatu dira txorroten erabilera desegokia edo beharrezkoa ez den ur kontsumoa bezalako arazoak, eta korridoreetan sentsibilizazio kartelak eta materialak egin dira. LH5ean infografiak eta kanpainak garatu dira ohitura arduratsu eta jasangarriak indartzeko.
Aldi berean, udalerriko uraren sistemaren ezagutza landu da. LH3-4ko ikasleek tokiko iturriak, uraren ibilbidea eta azpiegiturak aztertu dituzte, herritarrei inkestak eginez eta gorabeheren mapak osatuz. DBH1en hainbat arazo identifikatu dira, hala nola estolden egoera, mantentze-lan faltaren pertzepzioa eta zenbait gunetako gainezkatzeak. DBH4n uraren tratamendua, saneamendua eta banaketa aztertu dira, bisita eta behaketa zuzenen bidez.
Ikasturtean zehar jarduera osagarriak ere egin dira. Eskolako baratzean, LH3ko ikasleek jangelako hondakin organikoak bildu dituzte, konposta egin dute eta ongarri hori baratzerako erabili da, kontsumitzeko prest dauden letxugak landatuz eta bilduz. Gainera, Arriarango urtegia eta Aretxabaletako tratamendu planta bisitatu dira, uraren edangarri bihurtzeko prozesua ezagutzeko.
Era berean, Sasieta Mankomunitateko tailerrek hondakinen kudeaketa lantzeko aukera eman dute. LH6n murrizketa, berrerabilera eta birziklapena jorratu dira, eta DBH3n, “Hondakinak Kitto” tailerraren bidez, hondakinen inpaktuak aztertu dira eta hobetzeko neurriak proposatu dira. DBH2n “Uraren indarra energia berriztagarri gisa” jarduera egin da Zegaman, uraren energia aprobetxamenduari eta ingurumen balioari buruz hausnartuz.
Lazkaoko alkateak ikasleak zoriondu nahi izan ditu honakoa adieraziz: “Ikasleak zoriondu nahi ditut egindako lanagatik. Ura bizitzarako funtsezko baliabidea da, eta gure altxorrik handienetako bat. Hori gabe ezingo genuke bizi, ez elikagairik ekoitzi, ez gure ekosistemak zaindu. Horregatik da hain garrantzitsua txikitatik baloratzen eta babesten ikastea, eguneroko keinu txikien bidez, eta horiek, batuta, aldaketa handiak eragiten dituzte. Jarrai dezazuela jakin-minez, ilusioz eta konpromisoz.”
Oro har, Eskolako Agenda 2030 ikaskuntza, parte-hartzea eta jasangarritasuna integratzen dituen hezkuntza proiektu gisa finkatzen da, ingurumen kontzientzia eta uraren zein baliabide naturalen erabilera arduratsua indartuz.
